Exposición para o Día das bibliotecas 2017. "Aprender a pensar coa biblioteca escolar"

Como xa sabedes este ano o tema para conmemorar o Día das Bibliotecas é "Aprender a pensar coa biblioteca escolar", para o que preparamos esta selección de materiais.

Desde o luns podedes visitar a exposición con estes materias que nos pareceron interesantes para celebrar esta data; e se vos animades intentade resolver o cuestionario que vos propoñemos co fin de "aprender a pensar".

Pensa según o título. Que libros terías que consultar se queres saber…

1._ Como coidar o teu corpo?

2._ Cales son as causas do cambio climático?

3._ Como ser un bo peon e conductor?

4._ Cousas curiosas do noso planeta?

5._ Que actitude debo ter coas demais persoas (amigos, familia…)?

6._ Que facer co lixo para axudar a non contaminar?

7._ Cales foron os animais máis antigos que habitaron o planeta?

8._ Como é e como vive a xente de paises distintos ao noso?

9._ Que actitude debo ter na escola?

10._ Que animais viven na auga?

Ten en conta que para unha mesma pregunta pode haber máis de un título.

Outubro mes da biblioteca "Aprender a pensar coa biblioteca escolar"

Un curso máis iniciamos as actividades da biblioteca celebrando o Día da Biblioteca, o próximo 24 de outubro, este ano o lema proposto é"Aprender a pensar coa biblioteca escolar".

O ilustrador Xosé Tomás foi o encargado, nesta ocasión, de realizar a  interpretación gráfica do lema anual. 

Aprender a pensar a través dos contos, da tradición oral, das lecturas de ficción, da poesía, do teatro; a través das lecturas de materiais de divulgación científica, a través das investigacións. Aprender a pensar co cine e coa música. Aprender a pensar a través do diálogo, nos clubs de lectura, nas actividades compartidas. Aprender a pensar baixo a guía e orientación dun profesorado consciente da importancia da curiosidade como motor vital e, tamén, da importancia de activar no alumnado os mecanismos  para desenvolver o pensamento complexo. Aprender a pensar nas clases de filosofía, pero tamén fóra das aulas regladas, onde a vida flúe en todo o seu misterio. A biblioteca escolar é un espazo privilexiado para que o alumnado non perda a súa capacidade de asombro; para que aprenda a formularse preguntas diante dos distintos fenómenos naturais ou sociais e, tamén, a procurar algunhas respostas á complexidade que lle toca vivir.